ਪੰਜਾਬ ਵਿਚ ਜਿਲ੍ਹਾ ਤਰਨਤਾਰਨ ਦੇ ਵਿਧਾਨਸਭਾ ਹਲਕਾ ਖਡੂਰ ਸਾਹਿਬ ਦੇ ਪਿੰਡ ਨੌਰੰਗਾਬਾਦ ਵਿੱਚ ਫੀਡ ਫੈਕਟਰੀ ਵਿੱਚ ਬੁੱਧਵਾਰ ਦੀ ਸ਼ਾਮ ਨੂੰ ਸਾਢੇ ਛੇ ਵਜੇ ਹਾਦਸਾ ਹੋਇਆ ਹੈ। ਇਸ ਹਾਦਸੇ ਵਿੱਚ ਫੈਕਟਰੀ ਦੇ ਮਾਲਿਕ ਦਿਲਬਾਗ ਸਿੰਘ ਉਸਦੇ ਚਾਚਾ ਅਤੇ ਹੋਰ ਰਿਸ਼ਤੇਦਾਰ ਦੀ ਸੀਰੇ ਵਾਲੇ ਖੋਲ ਵਿੱਚ ਡਿੱਗਣ ਦੇ ਕਾਰਨ ਮੌਤ ਹੋ ਗਈ। ਜਦੋਂ ਕਿ ਦੋ ਹੋਰ ਮਜਦੂਰ ਗੰਭੀਰ ਦੱਸੇ ਜਾ ਰਹੇ ਹਨ। ਹਾਦਸੇ ਦਾ ਪਤਾ ਚਲਦਿਆਂ ਹੀ ਖਡੂਰ ਸਾਹਿਬ ਦੇ ਵਿਧਾਇਕ ਮਨਜਿਦਰ ਸਿੰਘ ਲਾਲਪੁਰਾ ਮੌਕੇ ਉੱਤੇ ਪਹੁੰਚੇ ਅਤੇ ਪ੍ਰਸ਼ਾਸਨ ਨੂੰ ਮੌਕੇ ਤੇ ਬੁਲਾ ਕੇ ਰਾਹਤ ਕਾਰਜ ਸ਼ੁਰੂ ਕਰਵਾਏ ਗਏ।
ਤਰਨਤਾਰਨ ਦੀ ਅਨਾਜ ਮੰਡੀ ਵਿੱਚ ਆੜ੍ਹਤ ਨੰਬਰ 149 ਉੱਤੇ ਆੜ੍ਹਤ ਦਾ ਕੰਮ ਕਰਨ ਵਾਲੇ ਦਿਲਬਾਗ ਸਿੰਘ ਉਮਰ 42 ਸਾਲ ਵਾਸੀ ਪਿੰਡ ਮੱਲਮੋਹਰੀ ਨੇ ਕਰੀਬ ਇੱਕ ਸਾਲ ਪਹਿਲਾਂ ਪਿੰਡ ਨੌਰੰਗਾਬਾਦ ਵਿੱਚ ਫੀਡ ਫੈਕਟਰੀ ਲਾਈ ਸੀ। ਇਸ ਫੈਕਟਰੀ ਵਿੱਚ ਦਿਲਬਾਗ ਸਿੰਘ ਦੇ ਨਾਲ ਉਸਦਾ ਚਾਚਾ ਹਰਭਜਨ ਸਿੰਘ ਵੀ ਹਿੱਸੇਦਾਰ ਸੀ। ਬੁੱਧਵਾਰ ਦੀ ਸ਼ਾਮ ਨੂੰ ਫੈਕਟਰੀ ਵਿੱਚ ਕੰਮ ਕਰਦੇ ਸਮੇਂ ਦਿਲਬਾਗ ਸਿੰਘ ਨੂੰ ਪਤਾ ਚਲਿਆ ਕਿ ਸੀਰੇ ਵਾਲੇ ਮੇਨਹੋਲ ਨੂੰ ਜਾਣ ਵਾਲੀ ਪਾਇਪ ਵਿੱਚ ਬਲੌਕਜ ਹੋ ਗਈ ਹੈ। ਦਿਲਬਾਗ ਸਿੰਘ ਬਲੌਕਜ ਦੇਖਣ ਲਈ ਫੈਕਟਰੀ ਦੇ ਹੋਲ ਵਿੱਚ ਉਤੱਰਿਆ ਜਿਸ ਵਿੱਚ ਸੀਰਾ ਵਗੈਰਾ ਜਮਾਂ ਹੁੰਦਾ ਸੀ। ਹੋਲ ਵਿੱਚ ਉਤਰਦੇ ਸਮੇਂ ਫੈਕਟਰੀ ਮਾਲਿਕ ਦਿਲਬਾਗ ਸਿੰਘ ਦਾ ਪੈਰ ਤਿਲਕ ਗਿਆ। ਦਿਲਬਾਗ ਸਿੰਘ ਨੂੰ ਸੀਰੇ ਵਿੱਚ ਧੰਸਦਾ ਦੇਖ ਉਨ੍ਹਾਂ ਦੇ ਚਾਚਾ ਹਰਭਜਨ ਸਿੰਘ ਉਮਰ 65 ਸਾਲ ਵੀ ਹੇਠਾਂ ਉੱਤਰ ਗਿਆ।
ਇਸ ਦੌਰਾਨ ਪਿੰਡ ਢੋਟੀਆਂ ਵਾਸੀ ਮਜਦੂਰ ਦਿਲਬਾਗ ਸਿੰਘ ਅਤੇ ਪਖੋਪੁਰ ਵਾਸੀ ਜਗਰੂਪ ਸਿੰਘ ਵੀ ਮੇਨਹੋਲ ਵਿੱਚ ਬਚਾਅ ਲਈ ਉੱਤਰ ਗਏ। ਮੇਨਹੋਲ ਵਿੱਚ ਸੀਰਾ ਇੰਨੀ ਤਦਾਦ ਵਿੱਚ ਸੀ ਕਿ ਚਾਰੇ ਉਸ ਵਿੱਚ ਧੰਸ ਗਏ। ਫੈਕਟਰੀ ਦੇ ਹੋਰ ਮਜਦੂਰਾਂ ਨੇ ਮੌਕੇ ਉੱਤੇ ਰੌਲਾ ਪਾਇਆ। ਹਾਦਸੇ ਦਾ ਪਤਾ ਚਲਦਿਆਂ ਹੀ ਖਡੂਰ ਸਾਹਿਬ ਦੇ ਵਿਧਾਇਕ ਮਨਜਿਦਰ ਸਿੰਘ ਲਾਲਪੁਰਾ ਮੌਕੇ ਉੱਤੇ ਪਹੁੰਚੇ। ਵਿਧਾਇਕ ਲਾਲਪੁਰਾ ਨੇ ਡੀਸੀ ਕੁਲਵੰਤ ਸਿੰਘ ਐਸਡੀਐਮ ਰਜਨੀਸ਼ ਅਰੋੜਾ ਐਸਐਸਪੀ ਗੁਲਨੀਤ ਸਿੰਘ ਖੁਰਾਨਾ ਸਿਵਲ ਸਰਜਨ ਡਾ. ਰੇਣੂ ਭਾਟੀਆ ਡਾ. ਸਵਰਣਜੀਤ ਧਵਨ ਨੂੰ ਖਬਰ ਕੀਤੀ।
ਹਾਦਸੇ ਵਾਲੀ ਥਾਂ ਤੇ ਪ੍ਰਸ਼ਾਸਨ ਨੇ ਪਹੁੰਚ ਕੇ ਮੇਨਹੋਲ ਵਿਚੋਂ ਚਾਰਾਂ ਨੂੰ ਬਾਹਰ ਕੱਢਿਆ ਅਤੇ ਗੁਰੂ ਨਾਨਕ ਦੇਵ ਸੁਪਰ ਸਪੈਸ਼ਲਿਟੀ ਹਸਪਤਾਲ ਦਾਖਲ ਕਰਵਾਇਆ ਗਿਆ। ਇੱਥੇ ਫੈਕਟਰੀ ਮਾਲਿਕ ਦਿਲਬਾਗ ਸਿੰਘ ਹਰਭਜਨ ਸਿੰਘ ਤੋਂ ਇਲਾਵਾ ਮਜਦੂਰ ਦਿਲਬਾਗ ਸਿੰਘ ਉਰਫ ਬਾਗਾ ਢੋਟੀਆਂ ਨੂੰ ਮ੍ਰਿਤਕ ਘੋਸ਼ਿਤ ਕਰ ਦਿੱਤਾ ਗਿਆ। ਜਦੋਂ ਕਿ ਪਿੰਡ ਪਖੋਪੁਰ ਵਾਸੀ ਮਜਦੂਰ ਜਗਰੂਪ ਸਿੰਘ ਦੀ ਹਾਲਤ ਗੰਭੀਰ ਬਣੀ ਹੋਈ ਹੈ। ਵਿਧਾਇਕ ਮਨਜਿਦਰ ਸਿੰਘ ਲਾਲਪੁਰਾ ਨੇ ਹਾਦਸੇ ਸਬੰਧ ਵਿੱਚ ਮੁੱਖਮੰਤਰੀ ਭਗਵੰਤ ਸਿੰਘ ਮਾਨ ਨੂੰ ਸੂਚਿਤ ਕਰ ਦਿੱਤਾ ਹੈ। ਤਿੰਨਾਂ ਲਾਸ਼ਾਂ ਨੂੰ ਸਿਵਲ ਹਸਪਤਾਲ ਦੇ ਮੋਰਚਰੀ ਵਿੱਚ ਰਖਵਾ ਦਿੱਤਾ ਹੈ। ਉਨ੍ਹਾਂ ਦਾ ਵੀਰਵਾਰ ਨੂੰ ਪੋਸਟਮਾਰਟਮ ਕਰਵਾਇਆ ਜਾਵੇਗਾ।
