ਪੰਜਾਬ ਦੇ ਜਿਲ੍ਹਾ ਅੰਮ੍ਰਿਤਸਰ ਵਿੱਚ ਅਵਾਰਾ ਕੁੱਤਿਆਂ ਨੇ ਮਚਾਈ ਦਹਿਸ਼ਤ ਪਿੰਡ ਭੰਗੋਈ ਦੇ ਖੇਤਾਂ ਵਿੱਚ ਬੈਠੇ ਪੰਜ ਛੇ ਕੁੱਤਿਆਂ ਨੇ ਉੱਥੋਂ ਲੰਘ ਰਹੇ ਬੱਚੇ ਨੂੰ ਦਬੋਚ ਲਿਆ ਅਤੇ ਉਸਦੇ ਸਰੀਰ ਦੇ ਵੱਖੋ ਵੱਖਰੇ ਹਿੱਸਿਆਂ ਨੂੰ ਕੱਟ ਦਿੱਤਾ। ਇਹ ਕੁੱਤੇ ਇਨ੍ਹੇ ਖਤਰਨਾਕ ਸਨ ਕਿ ਬੱਚੇ ਨੂੰ 200 ਮੀਟਰ ਤੱਕ ਘੜੀਸਦੇ ਹੋਏ ਲੈ ਗਏ। ਬੱਚੇ ਦੇ ਚੀਕਣ ਦੀ ਅਵਾਜ ਨੂੰ ਸੁਣ ਮੌਕੇ ਉੱਤੇ ਪਹੁੰਚੀ ਉਸਦੀ ਮਾਂ ਨੇ ਆਪਣੇ ਪੁੱਤਰ ਨੂੰ ਕੁੱਤਿਆਂ ਦੇ ਚੁੰਗਲ ਤੋਂ ਛੁਡਾਇਆ ਉਦੋਂ ਤੱਕ ਕੁੱਤਿਆਂ ਨੇ ਬੱਚੇ ਨੂੰ ਨੋਚ ਕੇ ਗੰਭੀਰ ਰੂਪ ਵਿਚ ਜਖਮੀ ਕਰ ਦਿੱਤਾ ਸੀ। ਬੱਚੇ ਨੂੰ ਗੰਭੀਰ ਹਾਲਤ ਵਿੱਚ ਗੁਰੂ ਨਾਨਕ ਦੇਵ ਹਸਪਤਾਲ ਵਿੱਚ ਦਾਖਲ ਕਰਵਾਇਆ ਗਿਆ। ਜਿੱਥੇ ਹੁਣ ਉਸਦੀ ਹਾਲਤ ਸਥਿਰ ਬਣੀ ਹੋਈ ਹੈ।
ਇਸ ਘਟਨਾ ਬਾਰੇ ਪਿੰਡ ਭੰਗੋਈ ਵਾਸੀ ਕੰਵਲਜੀਤ ਕੌਰ ਨੇ ਦੱਸਿਆ ਕਿ ਉਨ੍ਹਾਂ ਦੇ ਪਤੀ ਮਜਦੂਰੀ ਕਰਦੇ ਹਨ। 9 ਸਾਲ ਦਾ ਪੁੱਤਰ ਅਰਸ਼ ਪਿੰਡ ਦੀ ਦੁਕਾਨ ਉੱਤੇ ਗਿਆ ਸੀ। ਅਰਸ਼ ਖੇਤਾਂ ਵਿੱਚੋਂ ਹੁੰਦਾ ਹੋਇਆ ਚਲਿਆ ਗਿਆ ਤਾਂਕਿ ਦੁਕਾਨ ਉੱਤੇ ਜਲਦੀ ਪਹੁੰਚ ਜਾਵੇ। ਇਸ ਦੌਰਾਨ ਰਸਤੇ ਵਿੱਚ ਇੱਕ ਖੇਤ ਵਿੱਚ ਬੈਠੇ ਅਵਾਰਾ ਕੁੱਤੇ ਉਸਦੇ ਬੇਟੇ ਨੂੰ ਫੜਨ ਲਈ ਉਸਦੇ ਪਿੱਛੇ ਭੱਜੇ ਅਤੇ ਉਸਨੂੰ ਦਬੋਚ ਲਿਆ। ਉਨ੍ਹਾਂ ਨੇ ਦੱਸਿਆ ਕਿ ਕੁੱਤੇ ਬੱਚੇ ਨੂੰ ਨੋਚਦੇ ਰਹੇ ਅਤੇ ਉਸ ਨੂੰ 200 ਮੀਟਰ ਦੀ ਦੂਰੀ ਤੱਕ ਘੜੀਸਦੇ ਹੋਏ ਖੇਤਾਂ ਵਿੱਚ ਲੈ ਗਏ। ਅਰਸ਼ ਦੀਆਂ ਚੀਖਾਂ ਸੁਣ ਕੇ ਉਹ ਮੌਕੇ ਉੱਤੇ ਪਹੁੰਚੀ ਅਤੇ ਕੁੱਤਿਆਂ ਨੂੰ ਡਰਾ ਕੇ ਬੱਚੇ ਤੋਂ ਦੂਰ ਭਜਾਇਆ। ਲੇਕਿਨ ਉਦੋਂ ਤੱਕ ਅਵਾਰਾ ਕੁੱਤੇ ਉਨ੍ਹਾਂ ਦੇ ਬੇਟੇ ਨੂੰ ਬੁਰੀ ਤਰ੍ਹਾਂ ਨਾਲ ਜਖਮੀ ਚੁੱਕੇ ਸਨ। ਅਰਸ਼ ਦੇ ਸਰੀਰ ਉੱਤੇ ਇੱਕ ਵੀ ਕੱਪੜਾ ਨਹੀਂ ਬਚਿਆ ਸੀ।
ਕੰਵਲਜੀਤ ਕੌਰ ਨੇ ਦੱਸਿਆ ਕਿ ਉਨ੍ਹਾਂ ਨੇ ਤੁਰੰਤ ਕੁੱਝ ਲੋਕਾਂ ਦੀ ਮਦਦ ਨਾਲ ਆਪਣੇ ਬੇਟੇ ਨੂੰ ਗੁਰੂ ਨਾਨਕ ਦੇਵ ਹਸਪਤਾਲ ਵਿੱਚ ਦਾਖਲ ਕਰਵਾਇਆ। ਗੁਰੂ ਨਾਨਕ ਦੇਵ ਹਸਪਤਾਲ ਦੇ ਸਰਜਨ ਡਾ. ਰਾਕੇਸ਼ ਸ਼ਰਮਾ ਨੇ ਦੱਸਿਆ ਕਿ ਬੱਚੇ ਨੂੰ ਜਦੋਂ ਹਸਪਤਾਲ ਲਿਆਂਦਾ ਗਿਆ ਸੀ ਉਦੋਂ ਬਹੁਤ ਬੁਰੀ ਹਾਲਤ ਸੀ। ਪਰ ਹੁਣ ਹੌਲੀ ਹੌਲੀ ਬੱਚੇ ਦੀ ਹਾਲਤ ਵਿੱਚ ਸੁਧਾਰ ਹੋ ਰਿਹਾ ਹੈ। ਉਸਦੇ ਸਰੀਰ ਦੇ ਵੱਖਰੇ ਹਿੱਸਿਆਂ ਉੱਤੇ ਕੁੱਤਿਆਂ ਦੇ ਕੱਟੇ ਜਾਣ ਦੇ ਡੂੰਘੇ ਜਖਮ ਹਨ। ਉਨ੍ਹਾਂ ਨੂੰ ਭਰਨ ਵਿੱਚ ਕੁੱਝ ਵਕਤ ਲੱਗੇਗਾ।
