ਸਾਬਕਾ ਰਣਜੀ ਖਿਡਾਰੀ ਪ੍ਰਵੀਨ ਹਿੰਗਨੀਕਰ ਦੀ ਕਾਰ ਨਾਲ ਮੰਗਲਵਾਰ ਨੂੰ ਵੱਡਾ ਹਾਦਸਾ ਹੋ ਗਿਆ। ਦੱਸ ਦਈਏ ਕਿ ਇਸ ਕਾਰ ਹਾਦਸੇ ਵਿਚ ਪ੍ਰਵੀਨ ਹਿੰਗਨੀਕਰ ਗੰਭੀਰ ਰੂਪ ਵਿਚ ਜ਼ਖਮੀ ਹੋ ਗਿਆ, ਜਦੋਂ ਕਿ ਉਸ ਦੀ ਪਤਨੀ ਦੀ ਮੌਕੇ ਉਤੇ ਹੀ ਮੌ-ਤ ਹੋ ਗਈ। ਇਹ ਹਾਦਸਾ ਮੰਗਲਵਾਰ ਨੂੰ ਮਹਾਰਾਸ਼ਟਰ ਦੇ ਬੁਲਢਾਨਾ ਜ਼ਿਲੇ ਵਿਚ ਸਮਰਿਧੀ ਐਕਸਪ੍ਰੈੱਸ ਵੇਅ ਉਤੇ ਵਾਪਰਿਆ ਹੈ। ਪ੍ਰਵੀਨ ਹਿੰਗਨੀਕਰ ਦੀ ਕਾਰ ਟਰੱਕ ਨਾਲ ਜਾ ਟਕਰਾਈ।
ਇੱਕ ਪੁਲਿਸ ਅਧਿਕਾਰੀ ਨੇ ਦੱਸਿਆ ਕਿ ਟਰੱਕ ਪਿੰਡ ਦੇ ਕੋਲ ਹਾਈਵੇਅ ਦੇ ਕਿਨਾਰੇ ਖੜ੍ਹਾ ਸੀ ਜਦੋਂ ਕਾਰ ਨੇ ਪਿੱਛੇ ਤੋਂ ਟੱਕਰ ਮਾਰ ਦਿੱਤੀ। ਇਹ ਹਾਦਸਾ ਮੇਹਕਰ ਕੰਪਲੈਕਸ ਦੇ ਕਲਿਆਣਾ ਪਿੰਡ ਵਿੱਚ ਵਾਪਰਿਆ ਹੈ। ਸਾਬਕਾ ਰਣਜੀ ਖਿਡਾਰੀ ਅਤੇ ਵਿਦਰਭ ਕ੍ਰਿਕਟ ਐਸੋਸੀਏਸ਼ਨ ਦੇ ਸਾਬਕਾ ਪਿੱਚ ਕਿਊਰੇਟਰ ਪ੍ਰਵੀਨ ਉਮਰ 65 ਸਾਲ ਅਤੇ ਉਨ੍ਹਾਂ ਦੀ ਪਤਨੀ ਪੂਨੇ ਤੋਂ ਨਾਗਪੁਰ ਪਰਤ ਰਹੇ ਸਨ। ਟੱਕਰ ਇੰਨੀ ਜੋਰਦਾਰ ਸੀ ਕਿ ਕਾਰ ਦੇ ਪਰ-ਖੱਚੇ ਉੱਡ ਗਏ।
ਉਹ ਬੰਗਲਾਦੇਸ਼ ਕ੍ਰਿਕਟ ਬੋਰਡ ਵਿੱਚ ਕਿਊਰੇਟਰ ਵਜੋਂ ਕੰਮ ਕਰ ਰਹੇ ਹਨ। ਜ਼ਖਮੀ ਹਿੰਗਨੀਕਰ ਨੂੰ ਇਲਾਜ ਲਈ ਮੇਹਕਰ ਦੇ ਇਕ ਨਿੱਜੀ ਹਸਪਤਾਲ ਵਿਚ ਭਰਤੀ ਕਰਵਾਇਆ ਗਿਆ ਹੈ। ਪ੍ਰਵੀਨ ਹਿੰਗਨੀਕਰ ਦੇ ਕਰੀਅਰ ਵਿਚ ਹਿੰਗਨੀਕਰ ਨੇ 52 ਫਰਸਟ ਕਲਾਸ ਮੈਚਾਂ ਵਿਚ 2805 ਦੌੜਾਂ ਬਣਾਈਆਂ ਹਨ। ਇਸ ਦੌਰਾਨ 47 ਵਿਕਟਾਂ ਵੀ ਲਈਆਂ ਹਨ। ਇਸ ਦੇ ਨਾਲ ਹੀ ਉਨ੍ਹਾਂ ਨੇ 17 ਲਿਸਟ ਏ ਮੈਚਾਂ ਵਿੱਚ 390 ਦੌੜਾਂ ਬਣਾਈਆਂ ਅਤੇ ਸੱਤ ਵਿਕਟਾਂ ਲਈਆਂ।
ਕੁਝ ਸਮਾਂ ਪਹਿਲਾਂ ਰਿਸ਼ਭ ਪੰਤ ਦੀ ਕਾਰ ਨਾਲ ਵੀ ਹੋਇਆ ਸੀ ਹਾਦਸਾ
ਟੀਮ ਇੰਡੀਆ ਦੇ ਰਿਸ਼ਭ ਪੰਤ ਵੀ ਹਾਲ ਹੀ ਵਿੱਚ ਇੱਕ ਕਾਰ ਹਾਦਸੇ ਦਾ ਸ਼ਿਕਾਰ ਹੋਏ ਸਨ। ਇਸ ਹਾਦਸੇ ਵਿਚ ਰਿਸ਼ਭ ਬੁਰੀ ਤਰ੍ਹਾਂ ਜ਼ਖਮੀ ਹੋ ਗਏ ਸਨ। ਪਿਛਲੇ ਸਾਲ ਦਸੰਬਰ ਵਿਚ ਹੋਏ ਕਾਰ ਹਾਦਸੇ ਤੋਂ ਬਾਅਦ ਤੋਂ ਪੰਤ ਹੁਣ ਤੱਕ ਕ੍ਰਿਕਟ ਦੇ ਮੈਦਾਨ ਵਿਚ ਵਾਪਸੀ ਨਹੀਂ ਕਰ ਸਕੇ ਹਨ। ਪੰਤ ਕਦੋਂ ਤਕ ਪੂਰੀ ਤਰ੍ਹਾਂ ਫਿੱਟ ਹੋਣਗੇ, ਇਹ ਕਹਿਣਾ ਬਹੁਤ ਮੁਸ਼ਕਲ ਹੈ। ਇਸ ਆਉਣ ਵਾਲੇ ਵਰਲਡ ਕੱਪ ਤੱਕ ਵੀ ਉਨ੍ਹਾਂ ਦਾ ਖੇਡ ਮੈਦਾਨ ਵਿਚ ਵਾਪਸੀ ਕਰਨਾ ਮੁਸ਼ਕਲ ਲੱਗ ਰਿਹਾ ਹੈ।
