ਇਹ ਖ਼ਬਰ ਪੰਜਾਬ ਦੇ ਜਿਲ੍ਹਾ ਤਰਨਤਾਰਨ ਤੋਂ ਹੈ। ਇਥੇ ਨਸ਼ੇ ਲਈ ਪੈਸੇ ਨਾ ਦੇਣ ਉੱਤੇ ਖੇਮਕਰਨ ਵਿੱਚ ਬਾਜ ਸਿੰਘ ਨੇ ਪਤਨੀ ਮਲਕੀਤ ਕੌਰ ਉਮਰ 45 ਸਾਲ ਦੀ ਘੋਟਣਾ ਮਾਰ-ਮਾਰ ਹੱਤਿਆ ਕਰ ਦਿੱਤੀ ਹੈ। ਇਸ ਵਾਰਦਾਤ ਨੂੰ ਅੰਜਾਮ ਦੇਣ ਤੋਂ ਬਾਅਦ ਉਹ ਥਾਣਾ ਖੇਮਕਰਨ ਵਿੱਚ ਪਹੁੰਚਿਆ ਅਤੇ ਆਤਮਸਮਰਪਣ ਕਰਦਿਆਂ ਹੋਇਆਂ ਕਿਹਾ ਕਿ ਮੈਂ ਆਪਣਾ ਕੰਮ ਕਰ ਆਇਆ ਹਾਂ। ਮੈਨੂੰ ਕੋਈ ਪਛਤਾਵਾ ਨਹੀਂ ਮੈਨੂੰ ਜੇਲ੍ਹ ਭੇਜੋ ਭਾਵੇਂ ਗੋਲੀ ਮਾਰ ਦਿਓ।
ਖੇਮਕਰਨ ਦੇ ਵਾਰਡ ਨੰਬਰ ਇੱਕ ਵਾਸੀ ਜੋਗਿਦਰ ਸਿੰਘ ਦੇ ਬੇਟੇ ਬਾਜ ਸਿੰਘ ਦਾ ਵਿਆਹ 19 ਸਾਲ ਪਹਿਲਾਂ ਪੱਟੀ ਦੇ ਪਿੰਡ ਜਮਾਲਪੁਰ ਵਾਸੀ ਮਲਕੀਤ ਕੌਰ ਦੇ ਨਾਲ ਹੋਇਆ ਸੀ। ਬਾਜ ਸਿੰਘ ਮਜਦੂਰੀ ਕਰਦਾ ਸੀ ਅਤੇ ਫਿਰ ਨਸ਼ਾ ਕਰਨ ਲੱਗ ਪਿਆ। ਉਸਨੇ ਕੰਮਧੰਦਾ ਕਰਨਾ ਬੰਦ ਕਰ ਦਿੱਤਾ। ਢਿੱਡ ਪਾਲਣ ਦੇ ਲਈ ਬਾਜ ਦੇ ਬੇਟੇ ਅਕਾਸ਼ਦੀਪ ਸਿੰਘ ਅਤੇ ਜਗਰੂਪ ਸਿੰਘ ਆਪਣੀ ਮਾਂ ਮਲਕੀਤ ਕੌਰ ਦੇ ਨਾਲ ਮਿਲਕੇ ਮਜਦੂਰੀ ਕਰਨ ਲੱਗੇ। ਉਹ ਜੋ ਪੈਸੇ ਕਮਾਉਂਦੇ ਸਨ ਉਨ੍ਹਾਂ ਨੂੰ ਬਾਜ ਸਿੰਘ ਨਸ਼ਾ ਕਰਨ ਦੇ ਲਈ ਖੌਹ ਲੈਂਦਾ ਸੀ। ਪਤਨੀ ਅਕਸਰ ਇਸਦਾ ਵਿਰੋਧ ਕਰਦੀ ਸੀ। ਮੰਗਲਵਾਰ ਦੀ ਸ਼ਾਮ ਨੂੰ ਮਲਕੀਤ ਕੌਰ ਘਰ ਦੇ ਵਿਹੜੇ ਵਿੱਚ ਬੈਠੀ ਸੀ। ਸ਼ਰਾਬੀ ਹਾਲਤ ਵਿੱਚ ਬਾਜ ਸਿੰਘ ਬਾਹਰ ਤੋਂ ਘਰ ਆਇਆ ਅਤੇ ਪੈਸੇ ਮੰਗਣ ਲੱਗਿਆ। ਮਲਕੀਤ ਨੇ ਦੱਸਿਆ ਕਿ ਉਸ ਨੇ ਪੈਸਿਆਂ ਦਾ ਰਾਸ਼ਨ ਖ੍ਰੀਦ ਲਿਆ ਹੈ। ਹੁਣ ਕੇਵਲ ਦੁੱਧ ਲਈ ਪੈਸੇ ਬਚੇ ਹਨ। ਇਹ ਪੈਸੇ ਨਸ਼ੇ ਲਈ ਨਹੀਂ ਦੇਵਾਂਗੀ। ਅਕਾਸ਼ਦੀਪ ਸਿੰਘ ਨੇ ਪੁਲਿਸ ਨੂੰ ਬਿਆਨ ਦਰਜ ਕਰਵਾਉਂਦੇ ਹੋਏ ਦੱਸਿਆ ਹੈ ਕਿ ਪੈਸੇ ਨਾ ਮਿਲਣ ਕਾਰਨ ਉਸਦੇ ਪਿਤਾ ਬਾਜ ਸਿੰਘ ਨੇ ਰਸੋਈ ਵਿਚੋਂ ਘੋਟਣਾ ਚੁੱਕਿਆ ਅਤੇ ਮਲਕੀਤ ਕੌਰ ਉੱਤੇ ਕਰੀਬ ਚਾਰ ਤੋਂ ਪੰਜ ਵਾਰ ਕੀਤੇ। ਉਹ ਲਹੂ ਲੁਹਾਣ ਹੋਕੇ ਜ਼ਮੀਨ ਉੱਤੇ ਡਿੱਗ ਪਈ। ਅਕਾਸ਼ਦੀਪ ਨੇ ਦੱਸਿਆ ਕਿ ਉਸਨੇ ਆਪਣੇ ਪਿਤਾ ਸਾਹਮਣੇ ਕਈ ਮਿੰਨਤਾਂ ਤਰਲੇ ਕੀਤੇ ਪਰ ਉਸ ਨੇ ਇੱਕ ਨਹੀਂ ਸੁਣੀ।
ਸਭ ਡਿਵੀਜਨ ਭਿਖੀਵਿਡ ਦੇ ਡੀਐਸਪੀ DSP ਤਰਸੇਮ ਮਸੀਹ ਨੇ ਮੌਕੇ ਉੱਤੇ ਜਾਂਚ ਕੀਤੀ। ਅਕਾਸ਼ਦੀਪ ਸਿੰਘ ਦੇ ਬਿਆਨ ਦਰਜ ਕਰਕੇ ਥਾਣਾ ਇੰਨਚਾਰਜ ਸਭ ਇੰਸਪੈਕਟਰ ਗੁਰਬਚਨ ਸਿੰਘ ਨੇ ਬਾਜ ਸਿੰਘ ਦੇ ਖਿਲਾਫ ਹੱਤਿਆ ਦੇ ਇਲਜ਼ਾਮ ਵਿੱਚ ਕੇਸ ਦਰਜ ਕਰਕੇ ਉਸਨੂੰ ਗ੍ਰਿਫਤਾਰ ਕਰ ਲਿਆ ਹੈ। ਮਲਕੀਤ ਕੌਰ ਦੀ ਲਾਸ਼ ਨੂੰ ਪੱਟੀ ਹਸਪਤਾਲ ਤੋਂ ਪੋਸਟਮਾਰਟਮ ਕਰਵਾਕੇ ਪਰਵਾਰਿਕ ਮੈਂਬਰਾਂ ਨੂੰ ਸੌਂਪ ਦਿੱਤਾ ਹੈ।
